दीपोत्सव कार्यक्रमात वंचितांची धमाल
पणत्यांच्या झगमगत्या रंगली संगीत मैफल
तर आतषबाजीने उजळले आसमंत
अहमदनगर (प्रतिनिधी)- शहरातील लायन्स क्लब ऑफ अहमदनगरच्या वतीने सलग तेराव्या वर्षी एमआयडीसी येथील स्नेहालयात वंचित घटकातील मुलांसह दिवाळी साजरी केली.रांगोळ्यांनी सजलेले अंगण, लखलखत्या पणत्यांचा झगमगाट,फटाक्यांच्या आतषबाजीने उजळलेले आसमंत तर संगीताच्या तालावर ठेका धरत वंचित घटकातील मुला-मुलींनी दिवाळीचा आनंद लुटला.कोरोनानंतर मोठ्या उत्साहात साजरा करण्यात आलेला दीपोत्सव कार्यक्रमाची मेजवाणी विद्यार्थ्यांसाठी खास ठरली.यामध्ये स्नेहालयासह बालभवन व विविध संस्थेतील हजारापेक्षा जास्त विद्यार्थी सहभागी झाले होते.
दीपोत्सव कार्यक्रमाचे उद्घाटन माजी आमदार कुमार सप्तर्षी यांच्या हस्ते झाले. यावेळी मराठी सिने कलाकार स्मिता ओक, केंद्रीय अर्थमंत्री यांचे सचिव सीए सौरभ देशमुख, पोलीस उपाधीक्षक संदीप मिटके, डॉ.एस.एस. दीपक, शरद मुनोत, उद्योजक मोहन मानधना, लायन्सचे रिजन चेअरमन संतोष माणकेश्‍वर, लायन्सचे अध्यक्ष डॉ. अमित बडवे, सचिव सुनिल छाजेड, खजिनदार विपुल शहा, प्रकल्प प्रमुख सुधीर लांडगे, दिलीप कुकर्णी, प्रणिता भंडारी, बालकल्याण समितीचे हनीफ शेख, स्नेहालयचे समाधान पवार, संजय गुगळे, राजू गुजर आदी प्रमुख पाहुणे म्हणून उपस्थित होते.
कार्यक्रमाच्या प्रास्ताविकात अध्यक्ष डॉ. अमित बडवे यांनी वंचित घटकातील मुलांसमवेत दिवाळीचा आनंद द्विगुणीत करण्यासाठी दरवर्षी दीपोत्सवचे आयोजन केले जाते. या दीपोत्सवाचे तेरावे वर्ष असून, लायन्स क्लब मधील प्रत्येक सदस्य सेवाभावाने स्वतःला झोकून समाज घडविण्याचे कार्य करत असल्याचे त्यांनी सांगितले. पाहुण्यांचे स्वागत आनंद बोरा व प्रशांत मुनोत यांनी केले.
माजी आमदार कुमार सप्तर्षी म्हणाले की, दिवाळी सणाचा आनंद साजरा करून, तो आनंद वाटायचा असतो. समाजातील दुःखाचा अंधकार दूर करण्यासाठी प्रत्येकाने योगदान द्यावे.अवतीभोवती कुणी दुखी असू नये, हा संस्कार भावी पिढीत रुजविण्याचे कार्य लायन्स क्लब करीत आहे. आपली संपन्नता दुसर्यांचे दुःख कमी करण्यासाठी उपयोगी आली पाहिजे. प्रत्येक व्यक्ती आपले वैयक्तिक कामे समाजात राहून करत असतो.मात्र समाजाचे काम प्रत्येकाने केले पाहिजे, अन्यथा त्या जीवनाला साफल्य नाही.
समाजाचा धागा बिघडू न देता वावरल्यास सुख मिळतो. इतरांचे भले करताना तुमचे भले देखील त्यामध्ये सामावलेले असल्याचे त्यांनी सांगितले.तर राजकारणावर भाष्य करताना त्यांनी जातीवाद, धर्मवाद करणारे समाजात असल्याने भावी पिढीचे नुकसान होत आहे. सत्ताधारी व विरोधक कोणाचे काय चुकले? याकडेच लक्ष असल्याने नागरिकांचे प्रश्‍न दुर्लक्षित होत आहे. चुकीचे मतदान करणे हा गुन्हा असून, या गुन्ह्यामुळे आपली भावी पिढी उध्वस्त होत असल्याचे त्यांनी स्पष्ट केले. तर घर घर लंगर सेवेने कोरोना काळात केलेल्या कार्याचे त्यांनी कौतुक केले.
स्मिता ओक यांनी आयुष्य क्षणिक असून, हसत-खेळत आयुष्याचे गणित सोडविता आले पाहिजे. संधी प्रत्येकाच्या आयुष्यात येत असतात. आलेल्या संधी ओळखता आल्या पाहिजे. वादळात मागे सरकून, वादल थांबल्यावर मिळेल त्या संधी वर झडप घेऊन त्याचे सोने करण्याचे आवाहन त्यांनी विद्यार्थ्यांना केले.
या दीपोत्सवात ट्रील अकॅडमीच्या कलाकारांची संगीत मैफलने शोभा वाढवली. कलाकारांनी हिंदी, मराठी गाण्यासह धार्मिक, देशभक्ती व कव्वालीच्या सुमधूर गीतांचा नजराणा सादर केला. उपस्थितांनी या मैफलचा मनमुराद आनंद घेतला. संगीत मैफल रंगात आल्यावर बालगोपालांसह उपस्थित पाहुण्यांनी मराठी व हिंदी गीतांवर ठेका धरला होता.
लायन्स घेतलेल्या किल्ले बनवा स्पर्धेत मुलांनी उस्फुर्त सहभाग नोंदवून किल्ले बनवले. संध्याकाळी स्नेहालय परिसरात लावण्यात आलेल्या पणत्यांच्या प्रकाशाने लखलखाट झाला होता. तर फटाक्यांच्या आतषबाजीचा विद्यार्थ्यांनी मनमुराद आनंद लुटला.या धमालमय कार्यक्रमासह विद्यार्थ्यांना खाऊ, चॉकलेट, आईस्क्रिमसह भोजनाची मेजवाणी होती.
यावेळी किरण भंडारी, जस्मीतसिंह वधवा, रवींद्र बडवे, कैलास नवलानी, सतीश बजाज, डॉ.सिमरनकौर वधवा, डॉ. मीरा बडवे, भावना छाजेड, प्रीती शाह, मंगल बडवे, कमलाकर बडवे, मनीषाकौर वधवा आदींसह व्यापारी, उद्योजक व शहरातील प्रतिष्ठित नागरिक मोठ्या संख्येने उपस्थित होते.
कार्यक्रमाचे सूत्रसंचालन हरजितसिंह वधवा यांनी केले. आभार सुनील छाजेड यांनी मानले. कार्यक्रम यशस्वी होण्यासाठी घर घर लंगर सेवा, स्नेहालय परिवार, बाल कल्याण समिती यांचे विशेष सहकार्य लाभले.
